MEDIA19 dot ID

Ajeg Bali untuk Indonesia

Putri Koster Nyarengang UMKM Antuk Ngemit Tetamian Leluhur

2 min read
Ketua Dékranasda Bali, Ny. Putri Suastini Koster (tengah) mungkah Lomba Fashion Show Endek dan Songkét sané kamargiang olih Perkumpulan Perempuan Wirausaha utawi Perwira Daérah Bali ring Ubud, Gianyar, Saniscara Wagé Perangbakat (19/12/2020)

Ketua Dékranasda Bali, Ny. Putri Suastini Koster (tengah) mungkah Lomba Fashion Show Endek dan Songkét sané kamargiang olih Perkumpulan Perempuan Wirausaha utawi Perwira Daérah Bali ring Ubud, Gianyar, Saniscara Wagé Perangbakat (19/12/2020)

GIANYAR, Média Bali – Sayan akéhnyané wastra kakaryan saking dura Bali sané matehang motif wastra tradisional Bali kaurati olih Ketua Umum Déwan Kerajinan Daérah (Dékranasda) Provinsi Bali, Ny. Putri Suastini Koster. Nampénin kahanan inucap, para angganing usaha mikro, kecil dan menengah (UMKM) sané makarya ring sajeroning kerajinan busana Bali sida nglimbakang bidang busana antuk ngemit tetamian leluhur.

Putri Suastini maosang, mungguh ring dunia kréatif, kréativitas para angganing usaha pinaka parilaksana sané patut. Sakéwanten, ring pamarginnyané angganing industri kréatif kaaptiang sida ngambel pakem tetamian leluhur. “Sampun patut yéning panglimbakan kréativitas produksi kain tradisional nganggén téknik bordir utawi printing, nanging tatkala ngaryanang motif mangda nénten nuut utawi matehang motif khas Bali, baos dané tatkala ngicén sambrama wacana ring Lomba Fashion Show Endek dan Songkét sané kamargiang olih Perkumpulan Perempuan Wirausaha utawi Perwira Daérah Bali ring Ubud, Gianyar, Saniscara Wagé Perangbakat (19/12/2020).

Manut dané, ring sajeroning ngawigunayang kain tenun asli antuk bordir utawi printing sapatutnyané mabinayan. Kain tradisional Bali sida kaanggén antuk kamen, raris kain bordiran sida kaanggén antuk ngaryanin produk kréatif tiosan.

“Asil tenunan asli kaanggén ngaryanin kamen, raris kain bordiran kauduhang antuk kaanggén lakaran makarya busana utawi kerajinan sané lianan sakadi tas,” baos dane.

Tios mawesana ring kain tradisional, kahanan inucap taler katampénin ring produk kerajinan pérak. Ring galah ungkuran, kerajinan pérak akéh masaing sareng kerajinan alpaka sané nganggén téknik cétak. Métode cétak tios gelis antuk ngasilang tur nénten muatang galah sané sué taler janten mawesana ring kawagedan para pengrajin.

“Pungkuran, kawagedan antuk ngukir pérak sané pinaka tetamian leluhure nguni sida ical, punika mawinan titiang nyarengang samian angga antuk sumaken tur masikian sajroning ngemit taksu Bali puniki,” tuges dané.

Ring galah inucap, Ketua Perwira Daérah Bali, Anak Agung Putri Puspawati nlatarang, yéning pamargin fashion
show sané kalaksanayang saking paiketan ida antuk mikélingin Hari Ibu sané kaping-92 warsa 2020. Pinaka organisasi kaanggén genah majeng pengusaha istri, paiketan ida sampun rajeg mautsaha nyokong kréativitas anggota ring tengahing pandemi Covid-19. “Angayubagia pisan santukan anggota Perwira kantos mangkin sida aktif ngalaksanayang tur nglimbakang usaha,” baos ida ngicén aprésiasi Program Pemerintah Provinsi Bali, pamekas palestarian kain tenun tradisional. 005/jul

Tinggalkan Balasan

Alamat email Anda tidak akan dipublikasikan.

Copyright © Media Bali 2021 | Newsphere by AF themes.